اسلام آباد میں غیر ملکی شہریوں کی سکیورٹی کیلئے اسپیشل پروٹیکشن فورس بنانے کا فیصلہ کرلیا گیا۔ وفاقی وزیرداخلہ محسن نقوی نے ریڈ زون سمیت تمام اہم دفاتر و مقامات کی سکیورٹی پرخصوصی توجہ مرکوز کرنے کی ہدایت کردی۔

وفاقی دارالحکومت اسلام آباد میں وزیر داخلہ محسن نقوی کی زیر صدارت امن و مان سے متعلق اجلاس منعقد ہوا۔ جس میں وزیر داخلہ نے غیر ملکی شہریوں کی فول پروف سکیورٹی یقینی بنانے کی ہدایت کی۔ اجلاس میں اسلام آباد میں غیرملکی شہریوں کی سکیورٹی کیلئے اسپیشل پروٹیکشن فورس بنانے کا اصولی فیصلہ بھی کیا گیا۔

اس موقع پر محسن نقوی نے کہا کہ ٹیکنالوجی سے ملزمان کو قانون کی گرفت میں لایا جائے، تعلیمی اداروں کے باہر منشیات فروشی قابل برداشت نہیں۔

محسن نقوی نے منشیات فروشی میں ملوث ملزمان کیخلاف کریک ڈاؤن کا حکم دیا۔

وزیر داخلہ نے بھکاری مافیا اور پیشہ ور گدا گروں کیخلاف مؤثر کارروائی کے ساتھ مختلف مقدمات کی ایف آئی آر کے اندراج کو 100 فیصد یقینی بنانے کا حکم بھی دیا۔

وفاقی وزیر نے کہا کہ ایف آئی آر کا اندراج نہ کرنا یا تاخیر کسی طور قبول نہیں، ایف آئی آردرج نہ کرنے پرمتعلقہ پولیس افسر کیخلاف کارروائی ہوگی۔

محسن نقوی نے اسلام آباد پولیس کے پروموشن کیسز جلد نمٹانے کی ہدایت کرتے ہوئے کہا کہ ترقی ملازمین کا حق ہے جو اسے وقت پر ملنا چاہیے، پرموشن سے پولیس فورس کے مورال میں بہتری آئے گی، اسلام آباد پولیس میں تمام خالی آسامیوں پر بھرتیاں کی جائیں۔