پشاور میں وفاقی وزیر داخلہ محسن نقوی کی اور وزیراعلیٰ خیبر پختونخوا علی امین گنڈا پور کی ملاقات ہوئی ہے، جس میں صوبے میں امن و امان اور سکیورٹی صورتحال پر تبادلہ خیال کیا گیا اور دہشت گردوں کے خلاف انٹیلی جینس بیسڈ آپریشن مزید تیز کرنےکا فیصلہ کیا گیا۔

وزیر داخلہ محسن نقوی اور وزیر اعلیٰ علی امین گنڈاپور کے مابین ملاقات میں شانگلہ حملے کے سہولت کاروں کو بھی کیفر کردار تک پہنچانے کا عزم کیا گیا۔

علی امین گنڈاپور اور محسن نقوی نے شانگلہ حملے پر چینی حکومت، عوام اور مرنے والے چینی شہریوں کے خاندانوں سے مکمل یکجہتی کا اظہار کیا۔

اس موقع پر محسن نقوی کا کہنا تھا کہ چینی شہریوں پر حملے کے عناصر قرار واقعی سزا سے نہیں بچ سکیں گے۔

انہوں نے کہا کہ دہشت گردی کے خلاف جنگ پاکستان کی بقاء کی جنگ ہے، ہم خیبرپختونخوا کے ساتھ ہر ممکن تعاون کریں گے۔