لاہور ہائیکورٹ نے ریسٹورنٹس کو رمضان کے مہینے میں افطاری سے لے کر سحری تک کھلا رکھنے کی اجازت دے دی۔

لاہور ہائیکورٹ کے جسٹس شاہد کریم نے اسموگ کی درخواستوں پر گزشتہ سماعت کا تحریری حکم جاری کیا، دوران سماعت مختلف محکموں نے رپورٹس پیش کیں۔

کمیشن نے رپورٹ میں بتایا کہ ریسٹورنٹس اور کیفے مالکان تمام عدالتی احکامات پر عملدرآمد کروانے کے پابند ہوں گے، رمضان کے مہینے میں افطاری سے سحری تک کھولا رکھنے کی اجازت دی جائے جو کو عدالت نے منظور کرلیا۔

لاہور ہائیکورٹ نے ماحولیات سے متعلق اسکولوں کے بچوں کو ہفتے میں ایک روز پریکٹیکل کروانے کی ہدایت کردی۔

عدالت نے ایل ڈبلیو ایم سی سے اسکول کالجز کے بچوں کے ساتھ صفائی کی مہم کا حتمی پلان طلب کرلیا۔

لاہور ہائیکورٹ نے لیسکو اہلکاروں کو درخت کاٹنے سے روکنے کی ہدایات جاری کیں اور کہا کہ لیسکو اسٹاف نے اگر کوئی درخت کاٹنا ہو تو پہلے پی ایچ اے کو آگاہ کرے۔

بعدازاں عدالت عالیہ نے کاروائی 15 مارچ تک ملتوی کردی۔