سنی اتحاد کونسل نے صدارتی انتخاب کے لیے سرگرمیاں تیز کر دی ہیں۔

سنی اتحاد کونسل کے صدارتی امیدوار محمود خان اچکزئی کے بھتیجے ایاز اچکزئی صدارتی انتخابات کے سلسلے میں پنجاب اسمبلی پہنچے ہیں۔

ایاز خان اچکزئی کی سنی اتحاد کونسل کے رہنما رانا آفتاب، ملک احمد خان بھچرسے ملاقات ہوئی ہے، جس میں صدارتی انتخاب کے حوالے سے حکمت عملی پر غور کیا گیا ہے۔

جبکہ صدارتی امیدوار محمود خان اچکزئی کی ٹیلی فون سے رانا آفتاب اورملک احمد خان بھچر سے بات چیت بھی ہوئی ہے، ایاز خان اچکزئی نے پولنگ ایجنٹ کے فارم سنی اتحاد کونسل کے رہنماوں کے سپرد کردیے۔

اس موقع پر رانا افتاب کا کہنا تھا کہ سنی اتحاد کونسل کے تمام ارکان محمود خان اچکزئی کو ووٹ دیں گے، جبکہ احمد خان بھچر کا کہنا تھا کہ حکومتی امیدوار کے ووٹر فارم 47 والے ہیں، اس موقع پرعبداللہ اچکزئی بھی موجود تھے۔

قومی اسمبلی، صوبائی اسمبلیوں اور سینیٹ میں صدارتی انتخابات کے حوالے سے ووٹنگ 9 مارچ کو ہونے جا رہی ہے۔

واضح رہے صدارتی انتخابات کے حوالے سے پاکستان مسلم لیگ ن کی جانب سے سابق صدر آصف علی زرداری کی حمایت کا اعلان کیا گیا تھا جبکہ پاکستان تحریک انصاف کے حمایت یافتہ سنی اتحاد کونسل کے ممبران کی جانب سے پشتونخوا ملی عوامی پارٹی کے محمود خان اچکزئی کی حمایت کی جا رہی ہے۔