اسلام آباد کے میریٹ ہوٹل میں پی ٹی آئی کی پریس کانفرنس کے دوران بعض افراد کی آواز غیرارادی طور پر ٹی وی چینلز پر نشر ہوگی جس میں کچھ لوگوں کو کہتے سنا جا سکتا ہے کہ ”گورے تو چلے گئے ہیں، لوکل ہی رہ گئے ہیں۔“

یہ آواز بیک وقت آج نیوز سمیت کئی چینلز سے نشر ہوئی۔ اگرچہ اس کا سیاق و سباق واضح نہیں تھا تاہم ن لیگ کے سوشل میڈیا نے دعویٰ کیا کہ جب پی ٹی آئی رہنما فارم 45 کے بجائے مختلف چینلز کے سکرین شاٹس دکھا رہے تھے تو غیر ملکی میڈیا اٹھ کر چلا گیا اور پریس کانفرنس کے اندر سے کسی کی اواز ائی ”گورے تو چلے گئے لوکل رہ گئے ہیں بس۔“

پریس کانفرنس کے پس منظر میں بولنے والے دو افراد یہ بھی کہہ رہے ہیں کہ اس ماحول میں وہ (گورے) نہیں بیٹھ سکتے۔

واضح رہے کہ پی ٹی آئی نے اپنے امیدواروں کو اظہار خیال کی دعوت دی تھی جس پر تقریریں شروع ہوئیں۔ پی ٹی آئی کے شیرافضل مروت بار بار امیدواروں کو کہتے رہے کہ وہ مختصر بات کریں گے اور صرف دھاندلی پر توجہ دیں۔

پی ٹی آئی نے میریٹ ہوٹل میں مقامی اور غیرملکی صحافیوں کو پریس بریفنگ میں بلایا تھا جہاں فارم 45 کے ساتھ دھاندلی کا ثبوت دیا جانا تھا۔

پریس کانفرنس کے دوران ایک موقع پر اسٹیج کے دائیں جانب شورشرابا بھی دیکھا گیا جس پر پارٹی رہنماؤں نے کہاکہ شورشرابا کرنے والے یا تو خاموش ہو جائیں یا پھر حال سے باہر نکل جائیں۔