پاکستان پیپلزپارٹی کے رہنما مراد علی شاہ نے کہا ہے کہ ایم کیو ایم کو اپنا مزاج تھوڑا بدلنا ہوگا، ایم کیو ایم رہنماؤں کی زبان نامناسب تھی، پیپلز پارٹی وہی فیصلہ کرے گی جو ملکی مفاد میں ہو۔

اسلام آباد میں میڈیا سے گفتگو کرتےہوئے سابق وزیراعلیٰ سندھ مراد علی شاہ نے کہا کہ سندھ میں پیپلزپارٹی حکومت بنانے جارہی ہے، یہ الیکشن آسان نہیں تھے، لوگوں کا خیال ہے کہ سندھ میں آسانی سے الیکشن ہوئے، سندھ میں ہم پانچ سال سے الیکشن کی تیاری کررہے تھے۔

مراد علی شاہ نے کہا کہ کورونا کے دور میں اور سیلاب کی صورتحال میں ہم نے کام کیا، پیپلزپارٹی مشکل کی گھڑی میں سندھ کے عوام کے ساتھ کھڑی رہی۔

پیپلز پارٹی کے رہنما نے مزید کہا کہ گزشتہ روز جی ڈی اے کی پریس کانفرنس پر افسوس ہوا، میرے پیرپگارا سے ذاتی تعلقات ہے، پیر پگارا کو جی ڈی اے نے استعمال کیا، پیرپگارا صاحب پوری حقیقت معلوم کرلیتے تو اچھا ہوتا، جی ڈی اے نے پیرپگاڑا سے جھوٹ بولا، پیرپگارا کو زمینی حقائق نہیں بتائے گئے۔

سابق وزیراعلیٰ سندھ کا کہنا تھا کہ پیپلزپارٹی نے 80 فیصد سے زیادہ ووٹ لیے ہیں، 10 سیٹیں مانگنے کا آپ کا حق نہیں بنتا، ہم چاہتے ہیں سب کے ساتھ مل کر کام کریں، پیرپگارا اپنے دوست تبدیل کرلیں۔

مراد علی شاہ نے یہ بھی کہا کہ ایم کیو ایم کو اپنا مزاج تھوڑا بدلنا ہوگا، ایم کیو ایم رہنماؤں کی زبان نامناسب تھی، ایم کیو ایم بلدیاتی الیکشن لڑنے پر تیار نہیں تھی، ایم کیو ایم کہتی تھی ہمارے پاس پولنگ ایجنٹ نہیں، امن و امان کی خرابی قبول نہیں کریں گے۔

پیپلز پارٹی کے رہنما کا کہنا تھا کہ پیپلز پارٹی وہی فیصلہ کرے گی جو ملکی مفاد میں ہو، ہم نے بڑی مشکل سے کراچی شہر میں امن قائم کیا۔