راولپنڈی کے حلقہ این اے 57 اور پی پی 19 کے آزاد امیدوار اور سابق ایم پی اے چوہدری عدنان کے قتل کا مقدمہ درج کرلیا گیا۔

مقدمے میں چوہدری تنویر، چوہدری چنگیز، چوہدری دانیال، چوہدری اسامہ اور لقمان کامل کو نامزد کیا گیا ہے جبکہ چوہدری ندیم اقبال کی مدعیت میں مقدمہ درج کیا گیا۔

مقدمے کے متن میں کہا گیا کہ 2 نامعلوم افراد نے چوہدری عدنان کی گاڑی پر فائرنگ کی، فائرنگ کا واقعہ جناح پارک کے قریب پیش آیا، فائرنگ کے بعد دونوں ملزمان سڑک کے دوسری طرف کھڑی موٹر سائیکل پر بیٹھ کر فرار ہو گئے۔

مقدمے میں مزید کہا گیا کہ چوہدری عدنان کی چوہدری چنگیز، چوہدری تنویر اور ان کے بیٹوں سے رنجش تھی، لقمان کامل سے زمین کے خرید و فروخت کے مقدمات چل رہے ہیں، چوہدری عدنان بتایا کرتے تھے ان افراد سے جان کا خطرہ ہے۔

یاد رہے کہ گزشتہ روز راولپنڈی میں آزاد امیدوار چوہدری عدنان قاتلانہ حملے میں زخمی ہونے کے بعد دم توڑ گئے تھے۔

چوہدری عدنان 2018 میں پی ٹی آئی کے ٹکٹ پر ایم پی اے منتخب ہوئے تھے ، انہوں نے سانحہ 9 مئی کے بعد آزاد حیثیت اختیار کر رکھی تھی۔