متحدہ قومی موومنٹ پاکستان (ایم کیو ایم) کے رہنما ڈاکٹر فاروق ستار کا کہنا ہے کہ بلدیاتی انتخابات کے نتائج آج جعلی ثابت ہوگئے، مئیر کراچی اب استعفا دے دیں، کراچی اور حیدرآباد کا مینڈیٹ ایم کیو ایم کا تھا، ہے اور رہے گا۔

کراچی میں پریس کانفرنس کرتے ہوئے فاروق ستار نے کہا کہ 2018 میں چھینا گیا مینڈیٹ آج ہمیں واپس مل گیا، یہ متحرک اور منظم ایم کیوایم کی سب سے بڑی آزمائش تھی۔

انہوں نے کہا کہ میں کارکنوں کو زبردست خراج تحسین پیش کرتا ہوں، ساتھ ہی شہدا اور لاپتا ساتھیوں کے اہلِ خانہ کو سلام پیش کرتا ہوں۔

فاروق ستار نے کہا کہ ہم کراچی کا قومی کردار بحال کریں گے، یہ آزمائش ختم ہوئی، اب بڑی آزمائش شروع ہوئی ہے، کوئی غلطی کی گنجائش اب موجود نہیں۔

انہوں نے کہا کہ تشدد کا جواب بیلیٹ پیپر سے دیا ہے، ہم نے اپنے ساتھیوں کے قتل کا بدلہ جمہوریت سے لینا ہے۔