جمعیت علمائے اسلام (جے یو آئی) کے امیر مولانا فضل الرحمان نے کہا ہے کہ 8 فروری کو ووٹ کی پرچی پر جہاد اور اسلام دونوں جیت سکتے ہیں۔

خیبر پختونخوا کے ضلع لکی مروت میں انتخابی جلسے سے خطاب کے دوران مولانا فضل الرحمان نے کہا کہ ریاست مدینہ کا نعرہ لگانے والے ریاست مدینہ سے بےخبر تھے۔

انھوں نے کہا کہ سابقہ حکمران 75 سال سے قوم کو مطمئن نہ کرسکے جبکہ ملک میں عوام عدم تحفظ کا شکار ہیں۔

سربراہ جے یو آئی نے کہا کہ اقتدار میں آنے کے بعد مہنگائی ختم کرکے سب سے پہلے عوام کو تحفظ فراہم کریں گے۔

انہوں نے کہا کہ اس وقت ملک کے معاشی حالات انتہائی ابتر ہیں، جس کا ذمہ دار سابقہ حکمران ہیں۔

ان کا کہنا تھا کہ اسمبلی میں قران و سنت کے خلاف قانونی سازی ہوتی ہے جبکہ جے یو آئی نے کم نمائندگی کے باوجود اس کا راستہ روکا ہے۔