سپریم کورٹ نے کراچی میں فٹ پاتھوں پررکھے جنریٹرزسے متعلق میئر کراچی مرتضیٰ وہاب سے دو ماہ میں رپورٹ طلب کرلی۔

جسٹس منصورعلی شاہ نے ریمارکس دیے کہ راستے میں رکاوٹ دور ہونی چاہئے لیکن آلودگی زیادہ بڑا مسئلہ ہے ۔

سپریم کورٹ میں کراچی میں فٹ پاتھوں پررکھے گئے بڑے جنریٹرز کیخلاف کیس کی سماعت کے دوران میئر کراچی مرتضی وہاب سپریم کورٹ میں پیش ہوئے اور بتایا کہ شہر کے مختلف علاقوں میں 500 سے زائد جنریٹرز فٹ پاتھوں پر پڑے ہیں ۔

میئر کراچی کے مطابق چند جنریٹرز دھواں چھوڑنے کے باعث آلودگی کا باعث بن رہے ہیں۔ یہ جنریٹرز بنکوں اور اسپتالوں سمیت کئی نجی اداروں کے ہیں۔

جسٹس منصور علی شاہ نے مرتضیٰ وہاب سے کہا کہ جو جنریٹرز آلودگی کا باعث بن رہے ہیں ان کی نشاندہی کریں ۔ فٹ پاتھ پر جنریٹر پڑا ہے تو پیدل چلنے والا تھوڑا سا سائیڈ پر بھی ہوجائے گا۔