سندھ ہائیکورٹ میں کراچی کے علاقے اسکیم 33 میں بجنورکوآپریٹو ہاٶسنگ سوسائٹی کی زمین پر قبضہ ختم کرانے سے متعلق سماعت ہوئی۔ عدالت نے قبضہ ختم کروانے کیلئے مقامی انتظامیہ، پولیس اور رینجرز کو مشترکہ حکمت عملی بنانے کی ہدایت کردی۔

ڈپٹی کمشنر، ایس ایس پی ایسٹ اور رینجرز ونگ کمانڈر عدالت میں پیش ہوئے۔

دوران سماعت عدالت نے ایس ایس پی اور ڈی سی ایسٹ سے استفسار کیا بتائیں تجاوزات کے خلاف آپریشن کہاں پہنچا ؟

ڈی سی ایسٹ نے جواب دیا کہ ہمارے پاس مشینری نہیں ہے، استدعا کی کہ کے ایم سی کے ڈائریکٹر انکروچمنٹ کو حکم دیں ہمیں مشینری فراہم کریں۔

عدالت نے ڈی سی، ایس ایس پی، اور رینجرز سمیت دیگر فریقین کو میٹنگ کرنے کا حکم دیتے ہوئے کہا آپ سب آپس میں ملیں، بیٹھیں جائزہ لیں کہ کیسے قابضین کے خلاف کارروائی کرنی ہے۔

عدالت نے کہا کہ قابضین ایسے نہیں جائیں گے، قابضین کو ہٹانے کیلئے آپ کو فورس استعمال کرنی ہوگی۔

عدالت نے تیرہ فروری تک پیش رفت رپورٹ طلب کرلی۔