عام انتخابات 2024 کے لیے انتخابی عملے کی ترجیحی بنیادوں پر تربیت کا سلسلہ شروع کر دیا گیا ہے۔

الیکشن کمیشن کے ترجمان کے مطابق اب تک 5 لاکھ 79 ہزار 191 افراد کی ضروری تربیت مکمل ہوگئی، بقیہ 4 لاکھ 62 ہزار 222 افراد کی تربیت یکم فروری 2024 تک مکمل ہو جائے گی۔

ترجمان الیکشن کمیشن نے کہا کہ الیکشن کمیشن نے 9 لاکھ 85 ہزار 413 افراد کی تربیت نومبر کے آخری ہفتے میں شروع کی۔

ترجمان الیکشن کمیشن کے مطابق انتخابی عملے میں ڈی آر او، آر او، پریذائیڈنگ افسران، اسسٹنٹ پریذائیڈنگ افسران اور دیگر شامل ہیں، تربیتی پروگرام میں غیر حاضر رہنے والے عملے کے خلاف سخت تادیبی کارروائی عمل میں لائی جا رہی ہے۔

الیکشن کمیشن کے ترجمان کا مزید کہنا ہے کہ مرکزی کنٹرول روم 26 دسمبر سے مکمل فعال ہے، مرکزی کنٹرول روم میں اب تک 45 شکایات موصول ہوئیں، تمام کا ازالہ کیا جا چکا ہے۔

ترجمان الیکشن کمیشن نے کہا کہ مرکزی شکایت سیل میں آنے والی 165 شکایات پر فوری کارروائی کر کے متعلقہ حکام کو ہدایات جاری کی گئیں۔

ترجمان الیکشن کمیشن کے مطابق مرکزی کنٹرول روم کے ماتحت 180 کنٹرول روم صوبائی، ڈویژنل اور ضلعی سطح پر بھی فعال ہیں۔

ترجمان نے یہ بھی کہا کہ ملک بھر کے تمام اضلاع میں تعینات مانیٹرنگ ٹیمیں بھی متحرک ہوگئی ہیں، جو ضابطہ اخلاق کی خلاف ورزی والے تشہیری مواد کو روزانہ کی بنیادوں پر ہٹانے میں مصروف ہیں، ضابطہ اخلاق کی خلاف ورزیوں پر نوٹسز بھی جاری کیے جارہے ہیں، جن پر انکوائری کے بعد قانون کے مطابق کاروائی عمل میں لائی جائے گی۔