پاکستان مسلم لیگ ن اپنے بڑے رہنماؤں کو قومی اسمبلی کی ٹکٹوں سے محروم کردیا۔ اور آئی پی پی سے بھی سیٹ ایڈجسمنٹ نہ ہوسکی۔

مسلم لیگ ن نے لاہور سے اپنے ہی بڑے بڑے سیاسی برج الٹا دئیے ہیں، اور سابق اسپیکر قومی اسمبلی ایاز صادق سمیت متعدد اہم رہنماؤں کو قومی اسمبلی کی ٹکٹوں سے محروم کردیا ہے۔

پارٹی ذرائع کے مطابق مسلم لیگ ن نے لاہور سے قومی اسمبلی کی 14 میں سے 12 نشستوں پر ٹکٹوں کی تقسیم کیلئے نام شارٹ لسٹ کر لئے ہیں، تاہم نصیر بھٹہ، سابق ایم این اے وحید عالم خان بھی قیادت کو قائل کرنے میں ناکام رہے ہیں۔

پارٹی ذرائع نے بتایا کہ قیادت کی جانب سے سردار ایاز صادق، رانا مشہود، میاں مرغوب احمد اور رانا مبشر جسے اہم رہنماؤں کو بھی ٹکٹس نہ دینے کا فیصلہ کیا گیا ہے، تاہم ایازصادق کو سینیٹ یا کسی ضمنی الیکشن میں ٹکٹ آفر کئے جانے کا امکان ہے۔

دوسری جانب ذرائع کا کہنا ہے کہ قومی اسمبلی کے حلقہ این اے117 میں بھی استحکام پارٹی کے ساتھ ممکنہ سیٹ ایڈجسٹمنٹ کی وجہ سے آئی پی پی کے صدر علیم خان اور ن لیگ ملک ریاض میں سے کسی ایک امیدوار کا فیصلہ نہیں ہوسکا، تاہم آئی پی پی سے سیٹ ایڈجسٹمنٹ نہ ہونے کی صورت میں مسلم لیگ ن کے اپنے امیدوار انتخابی دنگل لڑیں گے۔

پارٹی ذرائع نے بتایا کہ قومی اسمبلی کے حلقہ این اے 118 سے حمزہ شہباز، 119 سے مریم نواز جب کہ این اے 120 میں سہیل شوکت بٹ شاٹ لسٹ کئے گئے امیدواروں میں نمایاں ہیں۔

این اے 121 سے شیخ روحیل اصغر، 122 سے خواجہ سعد رفیق، 123 سے شہباز شریف میدان میں اتریں گے، اور این اے 127 سے عطا تارڑ مسلم لیگ نون کے ممکنہ امیدواروں میں سرفہرست ہیں، اس حلقہ میں ان کے مد مقابل پیپلز پارٹی کے چیئرمین بلاول بھٹو نے کاغذات جمع کروائے ہیں، اور دونوں کے مابین کانٹے کا مقابلہ ہونے کا امکان ہے۔

این اے 128 سے حافظ نعمان اور این اے 129 سے مہر اشتیاق مسلم لیگ ن کے امیدوار بننے کی دوڑ میں سب سے آگے ہیں، جب کہ این اے 130 سے قائد نواز شریف کا خود میدان میں اترنے کا امکان ہے۔

پارٹی ذرائع کے مطابق آئی پی پی سے سیٹ ایڈجسٹمنٹ نہ ہوئی تو این اے 117 سے ملک ریاض اور 124 سے رانا مبشر اقبال لیگی امیدوار ہوں گے۔