پیپلزپارٹی کے رہنما ندیم افضل چن کا کہنا ہے کہ صرف پی ٹی آئی والوں کےکاغذات مستردنہیں ہوئے ہمارے بھی ہوئے ہیں، سمجھ نہیں آرہا کس کو اور کیوں فائدہ دیا جارہا ہے۔

آج نیوز کے پروگرام ”روبرو“ میں بات کرتے ہوئے پیپلزپارٹی کے رہنما ندیم افضل چن کا کہنا تھا کہ لوگوں کو الیکشن لڑنے دینا چاہئے، کسی سے زیادتی نہ ہو، پیپلزپارٹی پہلے بھی کہتی تھی آرٹیکل 62 اور 63 ختم ہونا چاہئے۔

ندیم افضل چن نے کہا کہ صرف پی ٹی آئی والوں کے کاغذات مسترد نہیں ہوئے، ہمارے لوگوں کےبھی مسترد ہوئے ہیں، جن کے کاغذات میں نقص تھا وہ مسترد ہوئے ہیں، سمجھ نہیں آرہا کس کو اور کیوں فائدہ دیا جا رہا ہے، عوام الیکشن چاہتے ہیں سلیکشن نہیں، سلیکشن ہوئی تو ملک میں استحکام نہیں آئے گا۔

ان کا مزید کہنا تھا کہ پی ٹی آئی میں بہت زیادہ لوگ پی پی کے ہیں، تحریک انصاف سے کوئی اتحاد نہیں ہورہا۔

پروگرام میں بات کرتے ہوئے مسلم لیگ ن کے رہنما نہال ہاشمی کا کہنا تھا کہ 3 سے 10جنوری تک اپیلوں کی سماعت ہوگی، امید ہے کہ معاملات حل ہوجائیں گے، معاملات حل نہ ہو تو امیدوار عدالت جاسکتا ہے۔