تحریک انصاف نے بلے کے نشان کے لئے پشاور ہائیکورٹ سے رجوع کرنے کا فیصلہ کرلیا ہے، بیرسٹر گوہر نے آج نیوز کو تصدیق کردی۔

تحریک انصاف کے ترجمان معظم بٹ کے مطابق پی ٹی آئی انٹرا پارٹی انتخابات اور بلے کا نشان واپس لینے کے لئے پشاور ہائیکورٹ سے رجوع کرنےکاحتمی فیصلہ کرلیا گیا ہے۔

ترجمان پی ٹی آئی معظم بٹ کا کہنا تھا کہ کل ہائیکورٹ سے رجوع کریں گے، کوشش ہوگی کہ درخواست کل ہی سماعت کے لئے بھی مقرر ہو، درخواست میں الیکشن کمیشن کا فیصلہ معطل کرنے کی استدعا کریں گے۔

معظم بٹ نے کہا کہ الیکشن کمیشن کا فیصلہ قانون طور پر ناقص فیصلہ ہے، غیرمتعلقہ شخص کی درخواست پر انتخابی نشان واپس لینا غیرقانونی ہے۔

دوسری جانب چئیرمین پی ٹی آئی بیرسٹر گوہر نے بھی آج نیوز کو اس حوالے سے تصدیق کردی ہے۔ اور ذرائع کا کہنا ہے کہ درخواست بیرسٹر گوہر اور علی ظفر کی جانب سے دائر کی جائے گی۔