امیر جماعت اسلامی سراج الحق کا کہنا ہے کہ آپ لوگ باہر ہیں،اندر کوئی اور فیصلے کر رہا ہے، ہم پر 75 سال سے اسٹیٹس کو مسلط ہے۔

جماعت اسلامی کے امیر سراج الحق کا کہنا تھا کہ کالج اور یونیورسٹی کے دور میں مزدوری کی ہے، حکومت مزدوروں کاخیال نہیں رکھتی، مزدور کے لئے لیبراور مچھر کالونیاں ہیں جہاں صرف گندگی ہے۔

سراج الحق کا کہنا تھا کہ ترقی یافتہ ممالک نے سرمایہ دار، جاگیردار کا مقابلہ کیا، لیکن ہماری قومی اسمبلی اور سینیٹ میں 100 فیصد جاگیردار، سرمایہ دار نظر آئیں گے، سڑکیں، بلند و بالاعمارتوں، پاکستان کی ترقی میں مزدورکا خون شامل ہے، لیکن المیہ ہے کہ اس وقت مزدورکی جھونپڑی میں روشنی نہیں، کیا ہم لوگ پاکستانی نہیں یا ٹیکس نہیں دیتے۔

امیر جماعت نے کہا کہ آٹا، پٹرول مافیا، شوگر اور دیگر مافیا صرف اپنے بارے میں سوچتے ہیں، اور جن لوگوں کو آپ اپنی بات سنانا چاہتے ہیں وہ اندھے، بہرے ہیں، آپ لوگ باہر ہیں،اندر کوئی اور فیصلےکر رہا ہے، 75 سال سے اسٹیٹس کوآپ پر مسلط ہے۔