کامونکی میں میونسپل کمیٹی کے ملازم کے بہیمانہ قتل کا ڈراپ سین ہوگیا، قاتل حقیقی بیٹا نکلا، ملزم نے اعتراف جرم کرلیا، ملزم کا اپنے والد کے ساتھ تیسری شادی کرنے اور جائیداد کا تنازع تھا۔

کامونکی میں تھانہ سٹی کے علاقہ پرانی آباد ی کے رہائشی میونسپل کمیٹی کے ملازم عبدالستار کی گھر میں کرسی پر بیٹھے ہوئے کی لاش ملی تھی، جس کو فائرنگ کرنے کے بعد چھرے کے ساتھ اس کی شہ رگ کاٹ دی گئی تھی۔

پولیس نے لاش پوسٹ مارٹم کے لئے اسپتال منتقل کرکے شبہ ہونے پر مقتول کے بیٹے حمزہ کو حراست میں لیا، تو اس نے اعتراف جرم کرلیا۔

پولیس حکام کے مطابق ملزم حمزہ کا اپنے والد عبدالستار کے ساتھ تیسری شادی کرنے اور جائیداد کا تنازع تھا، جس پر ملزم نے اس کو بیدردی کے ساتھ قتل کردیا، پولیس نے ملزم سے مزید تفتیش شروع کردی ہے۔