ہوٹلز اینڈ ریسٹورنٹس ایسوسی ایشن نے گیس قیمتوں میں ہوشربا اضافے کے خلاف اوگرا دفتر کے باہر احتجاج کیا مذاکرات کے بعد تاجروں کو 31 دسمبر تک بلوں کی تاریخ میں توسیع مل گئی جبکہ مذاکرات دوبارہ کرنے کی یقین دہانی پر تاجروں نے احتجاج عارضی ختم کردیا۔

رپورٹس کے مطابق گیس قیمتوں میں بے تحاشا اضافے کے خلاف جڑواں شہروں کے ہوٹلز مالکان سڑکوں پر نکل آئے اور اوگرا دفتر کے باہر احتجاج کے دوران اوگرا اور حکومت کے خلاف شدید نعرے بازی کی۔

کئی گھنٹے احتجاج کے بعد اوگرا حکام نے تاجروں کو مذاکرات کے لیے مدعو کیا، جس کے بعد تاجروں رہنماؤں کو بلوں کی تاریخ میں 31 دسمبر تک توسیع کی یقین دہانی کروائی گئی اور 2 دن بعد 20 دسمبر کو دوبارہ مذاکرات کرنے کی یقین دہانی کروائی گئی جس پر تاجروں نے احتجاج پرامن طور پر ختم کردیا۔

تاجروں نے کہا کہ اگلی میٹنگ میں مطالبات نہ مانے گئے تو احتجاج کا دائرہ کار وسیع کریں گے، تمام ہوٹلرز بند اور تمام اسٹاف سڑکوں پر مطالبات کی منظوری تک احتجاج کرے گا۔