پاکستان پیپلزپارٹی کے چیئرمین بلاول بھٹو زردری نے کہا ہے کہ کوئی سیاسی جماعت اس وقت پیپلز پارٹی کی مخالف نہیں، سیاسی جماعتوں کے دروازے بات چیت کے لیے ہمیشہ کھلے رہتے ہیں، صرف بلوچستان سے نہیں پورے ملک سے سرپرائز دیں گے، نواز شریف کا دور حکومت بھی پیپلزپارٹی کارکنان کے لئے آمریت سے کم نہیں تھا۔

لاہور میں میڈیا سے گفتگو کرتے ہوئے سابق وزیرخارجہ بلاول بھٹو نے کہا کہ ہماری حکومت بنے گی تو سب کو ساتھ لے کر چلیں گے،ہمارا مقابلہ کسی سیاسی جماعت سے نہیں، مہنگائی، غربت اور بیروزگاری سے ہے، اس وقت مہنگائی، غربت اور بیروزگاری عروج پر ہے، نوجوانوں، مزدوروں کو ریلیف دینے کے لیے پروگرام شروع کریں گے۔

ان کا مزید کہنا تھا کہ مہنگائی، غربت اور بیروزگاری نے عوام کو مشکل میں ڈال دیا، پیپلزپارٹی حکومت جب بھی آئے گی بیروزگاری کوختم کرے گی۔

بلاول بھٹو نے کہا کہ صرف بلوچستان سے نہیں پورے ملک سے سرپرائز دیں گے، ہم نے انقلابی منصوبہ بینظیرانکم سپورٹ شروع کیا۔

چیئرمین پیپلز پارٹی کا کہنا تھا کہ ملکی تاریخ میں اتنا بڑا معاشی بحران نہیں آیا، ہمیں نوجوانوں کو سمجھانا پڑے گا ہم سب محب وطن پاکستانی ہیں۔

انہوں نے یہ بھی کہا کہ پیپلز پارٹی کے کارکن ضیاء اور مشرف کی آمریت میں ہمارے ساتھ کھڑے رہے، میاں صاحب کا پہلا دور حکومت بھی کسی آمریت سے کم نہیں تھا۔

بلاول بھٹو نے ن لیگ پر تنقید کرتے ہوئے کہا کہ ملک میں نفرت اور تفریق کی سیاست ہو رہی ہے، پیپلز پارٹی وہ جماعت ہے جس کے کارکن ضیا اور مشرف کی آمریت میں پارٹی کے ساتھ کھڑے رہے، نواز شریف کا دور حکومت بھی پیپلزپارٹی کے کارکنوں کے لیے آمریت سے کم نہیں تھا۔