لاہور میں پولیس نے بیرون ملک سے آئے سکھ یاتریوں اور جاپانی شہریوں سے ڈکیتی کی واردات کرنے والے گروہ کو گرفتار کر لیا۔ ملزمان سے مسروقہ سامان بھی برآمد کرلیا گیا ہے۔

ایس پی سی آئی اے بلال فرقان نے پریس کانفرنس کرتے ہوئے بتایا کہ گرفتار ملزمان میں سرغنہ بادشاہ، سیف علی خان، کرامت علی اور محمد شہزاد شامل ہیں۔

انھوں نے کہا کہ سکھ یاتریوں اور جاپانی شہریوں سے ڈکیتی کی واردات کرنے والے ملزمان سے درجنوں موبائل فونز اور لاکھوں روپے برآمد کیے گئے۔

ان کا کہنا تھا کہ ملزمان نے دوران تفتیش لاہور میں درجنوں وارداتوں کا انکشاف کیا اور بتایا کہ وہ پاکستان میں مقیم غیر ملکی شہریوں کو اسلحے کی نوک پر لوٹتے اور فرار ہو جاتے تھے۔

ایس پی سی آئی اے کا کہنا تھا کہ جھنگ سے اغواء کیے گئے 13 سالہ علی شان جبکہ باغبانپورہ سے چند روز قبل اغواء کیے گئے 14 سالہ محمد ابراہیم کو بھی بازیاب کروایا گیا ہے۔