جمعیت علمائے اسلام آج پرویز خٹک کے آبائی گاؤں مانکی شریف میں سیاسی میلہ سجائے گی، سیاسی جلسے کے لیے سرکاری اسکول میں تعطیل کا اعلان کردیا گیا ہے۔

جمعیت علماء اسلام کے تحت آج نوشہرہ میں جلسہ ہوگا، جلسہ پرویز خٹک کے آبائی گاؤں مانکی شریف میں ہوگا، جس میں مولانا فضل الرحمان شرکت کریں گے۔

جلسے کی تمام تیاریاں مکمل کرلی گئی ہیں، جلسہ گاہ میں 5 ہزار سے زائد کرسیاں لگائی گئی ہیں، جب کہ 20 فٹ لمبا اور 40 فٹ چوڑا اسٹیج بھی تیار کر لیا گیا ہے۔

دوسری جانب مانکی شریف میں سیاسی جلسے کے لیے سرکاری سکول کو چھٹی دے دی گئی ہے، اور ضلعی انتظامیہ نے گورنمنٹ گرلز اسکول بند رکھنے کا اعلامیہ جاری کردیا ہے۔

ضلعی انتظامیہ کے مطابق جمعیت علمائے اسلام کے جلسے کے پیش نظر اسکول ایک دن کے لیے بند رہے گا۔