نیشنل الیکٹرک پاور ریگولیٹری اتھارٹی (نیپرا) نے ملک بھر کے بجلی صارفین کے لیے سہہ ماہی ایڈجسٹمنٹ کی مد میں بجلی ایک روپے 25 پیسے فی یونٹ تک مہنگی کرنے کی منظوری دے دی جبکہ ڈسکوز کی درخواست پر نیپرا اتھارٹی نے سماعت مکمل کر لی۔

یکساں ٹیرف کے لیے سہ ماہی ایڈجسٹمنٹ کا اطلاق کے الیکٹرک صارفین پر بھی ہوگا۔ بجلی صارفین پر 22 ارب 56 کروڑ روپے کا اضافی بوجھ ڈالنے کی درخواست ہے۔

نیپرا نے سہہ ماہی ایڈجسٹمنٹ کے تحت ڈسکوز کی اضافے کی درخواست پر سماعت مکمل کرلی، قیمتوں میں اضافے سے متعلق حتمی فیصلہ بعد میں جاری کیا جائے گا۔

جولائی تا ستمبر 2023 کی ایڈجسٹمنٹ کی درخواست پر چئیرمین نیپرا وسیم مختار کی صدارت میں سماعت ہوئی۔

نیپرا حکام کے مطابق ڈسکوز کی جانب سے سہہ ماہی ایڈجسٹمنٹ کے تحت اضافہ مانگا گیا اور مجموعی طور پر اضافے کی مد 22 ارب 56 کروڑ سے زائد کا اضافہ مانگا گیا ہے، کن ماہ میں یہ سہہ ماہی ایڈجسٹمنٹ وصول ہوگا اس حساب سے امپیکٹ آئے گا اور آئندہ تین ماہ میں اگر بوجھ منظور کر لیا جائے تو 1 روپے 25 پیسے اضافہ بنے گا۔

نیپرا حکام نے کہا کہ ڈسکوز کی جانب سے جولائی، اگست اور ستمبر میں بجلی کی خریداری کم کی گئی، تین ماہ میں بجلی کی مجموعی خریداری میں 9.50 فیصد کمی آئی، ڈسکوز نے 42 ارب کی بجائے 38 ارب یونٹس کی خریداری کی۔ ریفرنس لاگت کے مطابق اعداد و شمار آتے تو ایڈجسمنٹ منفی ہو سکتی تھیں۔

کیپیسٹی چارجز کی مد میں 12 ارب 12 کروڑ 60 لاکھ روپے، یوز آف سسٹم چارجز کے تحت 10 ارب 24 کروڑ 70 لاکھ روپے، آپریشن اینڈ مینٹیننس کی مد میں 4 ارب 61 کروڑ 70 لاکھ روپے اور نقصانات کی مد میں 6 ارب 61 کروڑ 70 لاکھ روپے وصول کرنے کی درخواست ہے۔

نیپرا قیمت میں اضافے سے متعلق حتمی فیصلہ کرے گا۔