پاکستان کی نامورگلوکارہ طاہرہ سید نے معروف وکیل نعیم بخاری سے علیحدگی کی وجوہات سے پردہ اٹھا دیا۔

حال ہی میں اداکارہ نے یوٹیوب کو ایک انٹرویو دیا جس میں انہوں نے اپنی ناکام ازدواجی زندگی پرروشنی ڈالی۔

میزبان نے جب گلوکارہ سے نعیم بخاری سے علیحدگی کے فیصلے کے بارے میں سوال کیا تو طاہرہ سید کا کہنا تھا کہ ’شادی کرتے وقت یا شروعات میں بھی کبھی ایسا نہیں لگا کہ آگے چل کر ہماری راہیں جُدا ہوجائیں گی‘۔

گلوکارہ کے مطابق نعیم بخاری اور انہوں نے یہ تہیہ کیا تھا کہ وہ اس شادی کو ہر طرح سے آخر تک نبھائیں گے۔

طاہرہ سید نے نعیم بخاری سے علیحدگی کے حوالے سے مزید کہا کہ ’ازدواجی زندگی کے دوران ایک ایسا وقت آیا کہ جب ہم نے سوچ لیا کہ اب ہم علیحدہ ہوجائیں‘۔

گلوکارہ نے اس فیصلے کو بہترین قرار دیتے ہوئے کہا کہ ’علیحدہ ہونے کا فیصلہ ایک اچھا فیصلہ تھا، کیونکہ نہ صرف ان کی بلکہ میری زندگی بھی اچھی ہوگئی، ہمارا شادی کرنے کا فیصلہ بھی بہت اچھا تھا اورعلیحدہ ہونے کا فیصلہ بھی بہت اچھا تھا‘۔

نعیم بخاری کا شمار ملک کے نامور وکلاء میں سے ایک میں ہوتا ہے، انہوں نے اب تک کئی اہم مقدمات لڑے ہیں۔

طاہرہ سید سے ان کے دو بچے ہیں، بیٹی نیویارک میں جبکہ بیٹا مسقط میں تعلیم حاصل کر رہے ہیں۔

طاہرہ سید پاکستان کی لیجنڈری گلوکارہ ہیں جن کی خوبصورت آواز کے سب معترف ہیں۔