کوئٹہ میں کانگو وائرس کا شکار ہونے والا ڈاکٹر انتقال کرگیا۔

شہر کے سول اسپتال کے ڈاکٹروں سمیت عملے کے 8 افراد کانگو وائرس کا شکار ہوگئے تھے، جن میں سے ایک ڈاکٹرشکراللہ انتقال کرگیا۔

محکمہ صحت کے ترجمان کے مطابق 8 میں سے سات افراد کو تشویشناک حالت میں ائیرایمبولینس کے ذریعے کراچی کے نجی اسپتال منتقل کیا گیا تھا۔

ترجمان نے بتایا کہ ڈاکٹر شکراللہ تین روز پہلے کانگو وائرس سے متاثر ہوئے تھے، جو دوران علاج ہی انتقال کرگئے۔

کوئٹہ کے سول اسپتال، شیخ زید اسپتال اور فاطمہ جناح اسپتال میں آئیسولیشن وارڈ قائم کردیے گئے ہیں۔

دوسری جانب نگراں وزیراعلی پنجاب محسن نقوی نے کوئٹہ میں کانگو وائرس کے باعث ڈاکٹر شکر اللہ کے جاں بحق ہونے کے واقعہ پر اظہار افسوس کیا۔

وزیر اعلی پنجاب محسن نقوی نے جاں بحق ڈاکٹر شکر اللہ کے خاندا ن سے دلی ہمدردی و اظہار تعزیت کرتے ہوئے کہا کہ شکر اللہ نے اپنی جان دے کر دکھی انسانیت کی خدمت کی مثال قائم کی ہے۔

محسن نقوی نے کہا کہ کانگو وائرس کے مریضوں کے علاج میں مصروف تمام ڈاکٹرز کو سلیوٹ کرتا ہوں، اپنی جان کی پرواہ کیے بغیر دکھی انسانیت کی خدمت میں مصروف ڈاکٹرز پر قوم کو فخر ہے۔