نگراں وزیراعظم انوار الحق کاکڑ کا کہنا ہے کہ عوام کے ٹیکسوں سے قومی اداروں کا خسارہ پورا کرنا مزید ممکن نہیں ہے۔

انوار الحق کاکڑ کی زیر صدارت پاکستان انٹرنیشنل ائیر لائنز (پی آئی اے) کے حوالے سے اجلاس ہوا جس میں قومی ائیر لائنز کے مختلف امور پر تفصیلی بریفنگ دی گئی۔

وزیرِاعظم نے پی آئی اے کے معاملات پر فیصلہ سازی میں تاخیر پر اظہار تشویش کرتے ہوئے کہا کہ قومی اداروں کا خسارہ مشکلات میں اضافہ کا باعث بن رہا ہے، عوام کے ٹیکسوں سے ان اداروں کا خسارہ پورا کرنا مزید ممکن نہیں۔

ان کا کہنا تھا کہ اصلاحات سے عوام کو بہترین سفری سہولیات فراہم کی جا سکیں گی، البتہ نجکاری کے عمل کی شفافیت کو یقینی بنایا جائے۔

اس سے قبل نگراں وزیراعظم کی زیر صدارت وفاقی کابینہ کا اجلاس ہوا جس میں ڈپٹی چیئرمین نیب اورپراسیکیوٹر جنرل نیب کی تقرری کی منظوری دے دی گئی۔

ذرائع کا کہنا کہ وفاقی کابینہ نے اجلاس میں ڈپٹی چیئرمین نیب اور پراسیکیوٹر جنرل نیب کی تقرری کی منظوری دی۔

پی آئی اے کی نجکاری کے لئے فنانشل ایڈوائزر کی تقرری کی منظوری بھی دی گئی ہے۔

ذرائع کے مطابق وفاقی کابینہ نے ای سی سی اور نجکاری کابینہ کمیٹی کے فیصلوں کی توثیق بھی کی۔

اجلاس میں بریگیڈیئرشاہد عامرافسرکو غیر ملکی ایوارڈ سے نوازنے کی منظوری کے علاوہ ملک کی مجموعی صورت حال کا تفصیلی جائزہ لیا گیا۔

ذرائع نے بتایا کہ امن و امان کی صورتحال پر کابینہ کو بریفنگ دی گئی۔

وفاقی وزرا آج شام 5 بجے کابینہ اجلاس میں کیے جانے والے فیصلوں سے متعلق بریفنگ دیں گے۔