ایشیا کپ 2023 کے اہم ترین مقابلے میں بارش ہونے کا امکان ظاہر کیا جا رہا ہے۔

واضح رہے کہ پاکستان اور بھارت کے درمیان میچ سری لنکا کے شہر پالے کیلے میں 2 ستمبر بروز ہفتے کو کھیلا جائے گا۔

بھارتی میڈیا کے مطابق گزشتہ دو دن سے پالے کیلے میں بارش ہو رہی ہے اور موسم کا حال بتانے والے مختلف ادارے ہفتے کے روز شدید بارش کی پیش گوئی کر رہے ہیں۔

موسم کا حال بتانے والی ایک ویب سائٹ کے مطابق ہفتے کو سری لنکن شہر پالے کیلے میں بارش کا 72 فیصد امکان ہے۔

بارش کی اس خبر نے کرکٹ شائقین کو کافی مایوس کر دیا ہےکیونکہ پاکستان اور بھارت صرف ایشین کرکٹ کونسل اور آئی سی سی کے بڑے میچز میں ہی آمنے سامنے آتے ہیں۔

سری لنکا میں اگست سے ستمبر کے دوران دھوپ اور صاف موسم کی توقع کم ہی کی جاتی ہے اور ان دو مہینوں میں کم سے کم کرکٹ میچز شیڈیولڈ ہوتے ہیں۔

پالے کیلے اب تک11 سال کے عرصے میں 33 ون ڈے میچز کی میزبانی کر چکا ہے اور ان میں سے صرف تین میچز اگست اور ستمبر کے دوران کھیلے گئے جس سے یہ واضح ہوتا ہے کہ میچز کی تاریخ مون سون کے موسم میں رکھنے سے گریز کیا جاتا ہے۔

لیکن سوال یہ اٹھتا ہے کہ پھر ایسے موقع پر ایشیا کپ کیوں کھیلا جا رہا ہے؟ دراصل یہ فیصلہ آخری لمحات میں کیا گیا تھا۔

جب یہ واضح ہو گیا کہ بھارتی ٹیم ٹورنامنٹ کے میزبان ملک پاکستان جانے کے لیے تیار نہیں تو ایشین کونسل کے پاس ہائبرڈ ماڈل کے سوا کوئی آپشن نہیں تھا، اسی لئے موسم کی پیش گوئی کے باوجود ایشیا کپکے زیادہ تر میچز سری لنکا منتقل کرنے پڑے۔

اگر پاک بھارت میچ کے دوران بارش ہوئی تو کیا ہوگا؟

50 اوور پر مشتمل ون ڈے میچ کا فائدہ یہ ہو سکتا ہے کہ بارش کی صورت میں گراؤنڈ اسٹاف کو کافی وقت مل جاتا ہے کہ وہ کم سے کم اوورز کا کھیل ممکن بنا سکیں اور اگر جم کر بارش برسی تو پاکستان بھارت میچ 20 اوور پر مشتمل ہو سکتا ہے۔

اور اگر یہ بھی ممکن نہ ہو پایا تو دونوں ٹیمیں ایک ایک پوائنٹس شیئر کریں گی، پاکستان خود بخود سُپر 4 مرحلے کے لیے کوالیفائی کر لے گا کیونکہ وہ پہلے ہی نیپال کو شکست دے چکا ہے جب کہ بھارت کو اگلے راؤنڈ میں جانے کے لیے اپنے گروپ فکسچر میں نیپال کو ہرانا ہوگا۔

سری لنکا کے پالے کیلے اسٹیڈیم کی بچ کیسی ہے؟

پالے کیلے انٹرنیشنل کرکٹ سٹیڈیم بڑے سکورز کے لیے جانا جاتا ہے جہاں میدان میں اترنے والی پہلی ٹیم کو عام طور پر فائدہ ہوا ہے۔

اس اسٹیڈیم نے اب تک 33 میچوں کی میزبانی کی ہے جن میں سے 18 مرتبہ پہلے فیلڈنگ کرنے والی ٹیم نے فتح حاصل کی۔

یہ بھی پڑھیں:

ایشیا کپ کے میچز کے لیے ٹیموں کے روٹس پر لگی لائٹس اور تاریں چور لے اڑے

مایہ ناز پاکستانی بلے باز بابر اعظم نے ایک اور ریکارڈ اپنے نام کرلیا

پالے کیلے سٹیڈیم کی پچ عام طور پر اننگز کے شروع میں تیز گیند بازوں کا ساتھ دیتی ہے لیکن جیسے جیسے میچ آگے بڑھتا ہے تو اسپنرز آہستہ آہستہ اس کی سطح سے فائدہ اٹھانا شروع کرتے ہیں۔