سندھ ہائیکورٹ نے صوبے بھر میں سود کے کاروبار سے منسلک افراد کے خلاف کریک ڈاؤن کا حکم دے دیا۔ عدالت نے حکم دیا کہ ایسے لوگوں کے خلاف کارروائی کی جائے جو مجبور لوگوں کا فائدہ اٹھاتے ہیں۔

سندھ ہائیکورٹ میں سود کے کاروبار کے خلاف درخواست پر سماعت ہوئی۔

عدالت نے صوبے بھر میں سود کے کاروبار سے منسلک افراد کے خلاف کریک ڈاؤن کا حکم دے دیا۔

عدالت نے آئی جی سندھ اور محکمہ داخلہ سندھ کو احکامات جاری کردیے۔ محکمہ داخلہ سندھ کے تمام ڈپٹی کمشنرز کو بھی سودی کاروبار سے منسلک افراد کے خلاف کارروائی کی ہدایت کردی گئی۔

جسٹس صلاح الدین پہنور نے احکامات میں کہا کہ آئی جی سندھ تمام ایس ایس پیز کو سود پر کاروبار کرنے والوں کے خلاف کارروائی کے احکامات جاری کریں۔ آئی جی سندھ کارروائی کرکے 26 ستمبر تک رپورٹ پیش کریں۔

عدالت نے احکامات دیے کہ سیکریٹری قانون 2 ماہ میں سود کے کاروبار کی روک تھام سے متعلق بنائے گئے ایکٹ کے رولز بناکر رپورٹ پیش کریں، اگر 2 ماہ رولز نہیں بنائے گئے تو سیکریٹری داخلہ عدالت میں ذاتی حیثیت میں پیش ہوں۔