پنجاب فوڈ اتھارٹی کی سیفٹی ٹیموں نے لاہورمیں کولڈ اسٹور پر چھاپہ مار کر 17ہزار کلو زائدالمیعاد فروزن فوڈ آئٹمز برآمد کر کے تلف کر دیئے۔

فوڈ اتھارٹی کی سیفٹی ٹیم نے رائیونڈ مانگا روڈ پر واقع کولڈ سٹور میں ریڈی ٹو کک فروزن فوڈ میں بڑی غفلت کا سراغ لگایا۔

اسٹورسے 17 ہزار کلو سموسے، سینڈ وچ، رول پٹیاں، نگیٹس اور فروزن پروڈکٹس برآمد کر کے تلف کر دیئے گئے۔

ڈی جی فوڈ اتھارٹی راجہ جہانگیر کے مطابق معروف برانڈ کی زائد المیعاد اشیاء برآمد ہونے پر کارروائی عمل میں لائی گئی، زائد المیعاد فروزن اشیاء کو کولڈ اسٹور میں رکھا گیا تھا۔ ایکسپائرڈ پروڈکٹس کو دوبارہ جعلی لیبل لگا کرسپلائی کیا جانا تھا۔

ڈی جی کے مطابق حفظان صحت اصولوں کے خلاف خوراک کا کاروبار کرنے کی ہرگز اجازت نہیں دی جائے گی۔ قوانین کی خلاف ورزی پر کاروبار بند کر دیا جا ئے گا۔