برطانوی اخبار گارڈین کو ملنے والی دستاویزات کے مطابق لندن میں اسرائیلی سفارت خانے کے حکام نے اٹارنی جنرل کے دفتر سے مظاہرین کیخلاف قانونی چارہ جوئی سے متعلق برطانوی عدالتی مقدمات میں مداخلت کرنے کی کوشش کی۔

فلسطین ایکشن کی جانب سے فریڈم آف انفارمیشن (ایف او آئی) کی درخواست کے ذریعے حاصل کی جانے والی دستاویزات سے ظاہرہوتا ہے کہ سفارت خانے کے حکام نے اٹارنی جنرل آفس (اے جی او) کے ڈائریکٹر جنرل ڈگلس ولسن پر برطانوی سرزمین پر ہونے والے مظاہروں سے متعلق مقدمات میں مداخلت کے لیے دباؤ ڈالا تھا۔

اگرچہ دستاویزات میں بہت زیادہ ترمیم کی گئی ہے اور اس وجہ سے اسرائیلی حکام کی درخواست کی تفصیلات ظاہر نہیں ہوتی ہیں ، لیکن ولسن کی طرف سے ایک ملاقات کے بعد سفارت خانے کے نمائندوں کو بھیجی گئی ایک ای میل میں کہا گیا ہے کہ، ’جیسا کہ ہم نے نوٹ کیا کراؤن پراسیکیوشن سروس اپنے استغاثہ کے فیصلے کرتا ہے اور آزادانہ طور پر اپنے کیس ورک کا انتظام کرتا ہے۔ لاء افسران کسی انفرادی معاملے میں مداخلت کرنے یا فعال کارروائی سے متعلق امور پر تبصرہ کرنے سے قاصر ہیں‘۔

ولسن کی جانب سے گزشتہ سال مئی میں بھیجی گئی ای میل میں حکام کو متنازع ہ پولیس، کرائم، کورٹس اینڈ سینشن ایکٹ کی شاہی منظوری کے بارے میں بھی آگاہ کیا گیا تھا، جس میں احتجاج پر سخت پابندیاں عائد کی گئی تھیں اور اٹارنی جنرل کی جانب سے کولسٹن مجسمے کے خلاف احتجاج کا مقدمہ اپیل کی عدالت میں بھیج دیا گیا تھا۔

اس سفارش کے نتیجے میں ججوں نے فیصلہ کیا تھا کہ ’ اہم’ مجرمانہ نقصان پہنچانے کے ملزم مظاہرین مقدمے کی سماعت کے دوران انسانی حقوق کے دفاع پر انحصار نہیں کر سکتے، جس سے احتجاج کے حق کو مزید محدود کر دیا گیا تھا۔

اے جی او نے ان کارروائیوں کا جواز پیش کرتے ہوئے کہا کہ اس انکشاف سے ”اسرائیل کے ساتھ برطانیہ کے تعلقات متاثر ہونے کا امکان ہے“۔

فلسطین ایکشن ایک سرگرم گروپ ہے جو بنیادی طور پر اسرائیلی ہتھیار بنانے والی کمپنی ایلبٹ سسٹمز کی برطانیہ کی فیکٹریوں کو نشانہ بناتا ہے۔کولسٹن کورٹ آف اپیل کے فیصلے کے بعد فلسطینی ایکشن کے کارکنوں کو ماحولیاتی مظاہرین کی طرح اسی طرح کے مقدمات میں سزا سنائی گئی ہے جن میں انہیں ماضی میں انسانی حقوق کے دفاع میں بری کیا گیا تھا۔

فلسطین ایکشن کی وکیل لیڈیا ڈاگوسٹینو نے کہا کہ اس انکشاف سے کئی سوالات پیدا ہوتے ہیں، کم از کم یہ کہ آیا یہ ملاقات براہ راست ایکشن گروپ فلسطین ایکشن کے بارے میں تھی یا نہیں۔ واضح طور پر مزید تحقیقات کی ضرورت ہے کہ اسرائیلی سفارت خانے کے کسی نمائندے نے کس حد تک کارکنوں سے متعلق مقدمات پر اثر انداز ہونے کی کوشش کی ہے۔

رواں سال فروری میں سفارت خانے کے حکام اور ولسن کے درمیان برطانیہ میں مبینہ جنگی جرائم کے الزام میں نجی گرفتاریوں کے بارے میں خط و کتابت ہوئی تھی۔ ایک بار پھر اسرائیلی درخواست کی تفصیلات میں ترمیم کی گئی لیکن ماضی میں برطانوی عدالتوں نے اعلیٰ اسرائیلی عہدیداروں کے وارنٹ جاری کیے ہیں جن میں تزیپی لیونی بھی شامل ہیں جنہیں 2009 میں وارنٹ جاری کیا گیا تھا۔

اس کے جواب میں ولسن نے وضاحت کی کہ کس طرح نجی وارنٹ گرفتاری کے اجراء کے طریقہ کار کو سخت کیا گیا ہے اور اب ڈائریکٹر آف پبلک پراسیکیوشن کی رضامندی درکار ہے۔ انہوں نے یہ بھی مشورہ دیا کہ ”خصوصی مشن استثنیٰ“ کے لئے خارجہ، دولت مشترکہ اور ترقیاتی دفتر میں درخواست دینا ممکن ہے۔

بڑے پیمانے پر عوامی مظاہروں کے درمیان، عرب مخالف حکمران اسرائیلی اتحاد نے گزشتہ ماہ ایک قانون منظور کیا تھا جس نے قوانین کو منسوخ کرنے کے لئے اس کی عدلیہ کے اختیارات کو محدود کر دیا تھا۔ خیال کیا جاتا ہے کہ کم از کم جزوی طور پر اس کی وجہ وزیر اعظم بنجمن نیتن یاہو کو بدعنوانی کے الزامات سے بچانے کی خواہش تھی۔

اسرائیلی سفارت خانے کے ترجمان نے کہا کہ وہ برطانوی عدالتی نظام کی آزادی کا احترام کرتے ہیں اور کسی بھی صورت میں برطانیہ کی قانونی کارروائی میں مداخلت نہیں کریں گے۔ انہوں نے مزید کہا کہ، ’اپنے جاری کام کے ایک حصے کے طور پر، اسرائیلی سفارت خانہ اسرائیل سے متعلق اداروں کے خلاف شدید حملوں کے بارے میں آگاہی پیدا کرتا ہے‘۔

اس حوالے سے مزید کہا گیا تھا کہ برطانیہ سمیت دنیا بھر میں اسرائیلی سفارت خانوں کی ذمہ داری ہے کہ وہ اسرائیلیوں کی دیکھ بھال کریں اور ان کی مدد کریں۔