پاکستان مسلم لیگ (ق) کے چیف آرگنائزر چوہدری سرور نے کہا ہے کہ نگراں وزیراعظم کے لئے ہماری پارٹی سے کسی نے مشاورت نہیں کی۔

لاہور میں میڈیا سے گفتگو میں چوہدری سرور نے کہا کہ ملک میں اس وقت غیر یقینی صورتحال ہے، پاکستان ڈیموکریٹک موومنٹ ( پی ڈی ایم) اور سابق وزرا کو بھی نہیں پتہ کہ آگے کیا ہوگا۔

یہ بھی پڑھیں: وفاقی کابینہ کی تحلیل: سینیٹ کی قائمہ کمیٹیوں کے اجلاس ملتوی

مسلم لیگ ق کے رہنما اور سابق گورنر پنجاب نے عام انتخابات کی تاریخ سے لاعلمی کا اظہار کرتے ہوئے کہا کہ الیکشن کب ہوں گے کچھ کہہ نہیں سکتے۔

پاکستانی معیشت اور مہنگائی کے حوالے سے ان کا کہنا تھا کہ پچھلی تمام حکومتوں نے عوام کو ریلیف نہیں دیا، شرح سود 22 فیصد ہوگی تو کاروباری افراد کیسے گزارا کریں گے۔ آئی ایم ایف کے تین ارب ڈالر کی بجائے اوورسیز کمیونٹی پر توجہ دی جائے۔

پاکستان مسلم لیگ (ق) کے چیف آرگنائزر چوہدری سرور نے ایک سوال کے جواب میں کہا کہ میرا استعفیٰ ہر وقت میری جیب میں ہوتا ہے، اس دفعہ میں بھی گھبرا گیا ہوں۔