وفاقی وزیر خزانہ اسحاق ڈار نے کہا ہے کہ دنیا چاہتی تھی کہ پاکستان دیوالیہ ہو اور تماشہ بنے، اگر آئی ایم ایف سے بات نہ ہوتی تو پلان بی تیار تھا۔

سینیٹ اجلاس میں بات کرتے ہوئے اسحاق ڈار نے کہا کہ چین کو ہم ادائیگی کرتے ہیں اور چین کچھ وقت کے بعد وہ رقم واپس کردیتا ہے، آئی ایم ایف کے معاہدے کو بروقت مکمل کیا جائے گا۔

انھوں نے کہا کہ ہم نے ساڑھے 5 ارب ڈالرز 6 ، 7 ماہ میں کمرشل بینکوں کو واپس کیے، کوشش ہے کہ زرمبادلہ کے ذخائر 14 ،15 ارب ڈالرز کردیں۔

وفاقی وزیر کا کہنا تھا کہ کہا گیا کہ فلاں پیمنٹ نہیں ہوگی، فلاں ادائیگی بڑی ہے، اللہ کا شکر ہے کہ تمام ادائیگیاں وقت پر کیں، اب زرمبادلہ کے ذخائیر بھی بہتر ہورہے ہیں۔

قومی ایئرلائن کی بات کرتے ہوئے اسحاق ڈار کا کہنا تھا کہ ایک سابق وزیر کے بیان کی وجہ سے پی آئی اے گراؤنڈ ہوا۔