عالمی مالیاتی فنڈ (آئی ایم ایف) نے پاکستان کی معاشی کارکردگی سے متعلق رپورٹ جاری کردی ۔ رپورٹ میں آئی ایم ایف رواں مالی سال بیروزگاری کم ہونے کے علاوہ اوسط مہنگائی بھی کم ہونے کی پیش گوئی کی گئی ہے۔

رپورٹ کے مطابق رواں مالی سال سال 2023-24 میں معاشی شرح نمو 2.5 فیصد رہنے کا امکان ہے۔ گزشتہ مالی سال معاشی کارکردگی منفی 0.5 فیصد رہی جبکہ حکومت نے جی ڈی پی گروتھ 0.3 فیصد مثبت رہنے کا دعویٰ کیا تھا۔

حکومت نے نئے بجٹ میں معاشی ترقی کا ہدف ساڑھے3 فیصد مقررکررکھا ہے۔

رپورٹ میں آئی ایم ایف کا کہنا ہے کہ سال 2024 میں پاکستان میں بیروزگاری ساڑھے 8 فیصد سے کم ہوکر 8 فیصد پرآجائے گی ۔ اس کے علاوہ رواں مالی سال میں اوسط مہنگائی بھی 29.6 فیصد سے کم ہو کر 25.9 فیصد پرآنے کی پیشگوئی کی گئی ہے۔ عالمی مالیاتی ادارے نے کہاہے کہ مالی سال 2024 کے خاتمے یعنی جون 2024 تک پاکستان میں مہنگائی کی شرح کم ہو کر 16 فیصد پر آ جائے گی۔

آئی ایم ایف کے مطابق رواں سال مالی خسارہ معمولی کمی سے ساڑھے 7 فیصد رہنے کا امکان ہے۔

رپورٹ میں پرائمری سرپلس جی ڈی پی کا 0.4 فیصد رہنے کا امکان ہے۔ اس کے علاوہ کیا گیا ہے کہ پاکستان کے ذمہ قرضوں کا حجم 81.8 فیصد سے کم ہو کر 74.9 فیصد پر آجائے گا۔

پاکستان کے اندرونی اور بیرونی دونوں قرضوں میں کمی کی پیش گوئی کی گئی ہے۔