زمان پارک میں پی ٹی آئی کارکنوں پر توڑ پھوڑ اور پولیس پر حملوں کے حوالے سے درج مقدمات کے کیس میں لاہور ہائیکورٹ نے مقدمات کی تفتیش کے لیے تشکیل دی گئی جے آئی ٹی کے متعلق فیصلہ سنا دیا۔

عدالت نے جے آئی ٹی کی تشکیل کے خلاف درخواستوں کو مسترد کرتے ہوئے کہا کہ حکومت نے جے آئی ٹی قانون کے مطابق تشکیل دی۔

فیصلے میں کہا گیا کہ درخواست گزار انفرادی طور پر ٹرائل کورٹ میں انسداد دہشت گردی دفعات کے اطلاق بارے میں رجوع کرسکتا ہے۔

جسٹس محمد امجد رفیق نے پی ٹی آئی رہنماؤں کی درخواستوں پر 5 مئی کو محفوظ کیا گیا فیصلہ آج سنایا ہے، 3رکنی بنچ کی جانب سے 28 صفحات پر مشتمل متفقہ فیصلہ جاری کیا گیا ہے۔ پی ٹی آئی رہنما مسرت جمشید چیمہ اور فواد چوہدری نے جے آئی ٹی کی تشکیل کو چیلنج کیا تھا ، جس پر جسٹس طارق سلیم شیخ ، جسٹس فاروق حیدر اور جسٹس امجد رفیق پر مشتمل بنچ نے سماعت کی تھی۔