نگراں وزیراعلیٰ پنجاب محسن نقوی نے ٹیکنیکل تعلیم حاصل کرنے والے قیدیوں کی سزا میں کمی کا اعلان کردیا۔

وزیراعلیٰ پنجاب کی زیر صدارت جیل ریفارمز سے متعلق اجلاس منعقد ہوا جس میں سزا میں کمی کی مدت 2 ماہ سے بڑھا کر 3 ماہ کر دی گئی، سزا میں کمی کا اطلاق سال میں 2 بار ہوسکے گا۔ آٹھ جیلوں کی انتظار گاہوں میں سہولیات بہتر بنانے کے پروگرام کا آغاز بھی کر دیا گیا۔

نگراں وزیراعلیٰ کی ہدایت پر جیلوں میں پی سی اوز کی تعداد میں اضافہ کردیا گیا جبکہ قیدیوں کے لئے ویڈیو کال اور انٹرنیشنل کال کی سہولت بھی فراہم کر دی گئی۔ جیل اسپتالوں کا انتظام محکمہ صحت کے سپرد کر دیا گیا۔

بیرکس میں کیبل کے ساتھ ایل ای ڈی ٹی وی کی سہولت مہیا کر دی گئی۔ اجلاس میں قیدی کو پیرول پر رہا کرنے کا اختیار سپرنٹنڈنٹ جیل کو دینے کا فیصلہ کیا گیا۔