خیبرپختونخوا حکومت نے سرکاری گاڑیوں کی مونٹائزیشن کا فیصلہ کرلیا، چالیس ہزار سے زائد سرکاری گاڑیاں افسران کو فروخت کی جائیں گی۔

ذرائع کے مطابق خیبرپختونخوا حکومت کو سرکاری گاڑیوں کی مونٹائزیشن سے 10 ارب روپے کی آمدن ہوگی، صوبائی حکومت نے نئی گاڑیوں کی خریداری پر پابندی کا فیصلہ بھی کیا ہے۔

ذرائع کا کہنا ہے کہ ریسکیو، پولیس موبائل اور میونسپلٹی کی گاڑیوں کو سرکاری حیثیت دینے کا فیصلہ بھی کرلیا گیا ہے جبکہ سرکاری افسر گاڑی 2 سے 3 اقساط میں خرید سکتے ہیں، ایک افسر ایک ہی گاڑی خریدنے کا مجاز ہوگا۔

سرکاری گاڑیوں کی مونٹائزیشن کے حوالے سے ذرائع نے مزید بتایا کہ سرکاری افسران کو ڈرائیور کی سہولت نہیں دی جائے گی جبکہ افسران کو باقاعدہ سبز نمبر پلیٹ دی جائے گی۔