پی ڈی ایم کے سربراہ مولانا فضل الرحمان کا کہنا ہے کہ سی پیک پاکستان کی ترقی کا راستہ ہے، لیکن ایک تیسری قوت پیدا کی گئی جس کاایجنڈا سی پیک کوروکنا تھا۔

پشاور میں میڈیا سے بات کرتے ہوئے جے یو آئی کے سربراہ مولانا فضل الرحمان کا کہنا تھا کہ چین کے ساتھ ہماری دوستی غیرمتنازع ہے، چین نے پاکستان میں بے شمار شعبوں میں دلچسپی کا اظہار کیا، سی پیک پاکستان کی ترقی کا راستہ ہے۔

سربراہ جے یو آئی نے کہا کہ چین نے اپنے پیسے سے ہوائی راستے سے تجارت کے لیے بھی گوادر میں ایئرپورٹ بنایا، لیکن ایک وقت میں جو بندگارہ اس خطے کی سب سے گہری بندرگاہ تھی، 3 سال کے عرصے میں کام نہ ہونے کی وجہ سے مٹی نے اس کے کنارے بھر دیئے، اور اب وہاں کہیں 9 فٹ تو کہیں 12 فٹ کی گہرائی رہ گئی ہے۔

مولانا فضل الرحمان کا کہنا تھا کہ ریلوے لائن اوردیگرپروجیکٹ سی پیک سے جڑے ہیں، لیکن ایک تیسری قوت پیدا کی گئی جس کا ایجنڈا سی پیک کوروکنا تھا، سی پیک روکنے کےلیے اس تیسری قوت کو پاکستان دے دیا گیا۔

سربراہ جے یو آئی نے کہا کہ پاکستان اورچین کے تجارتی تعلقات کو مضبوط کرنا ہوگا، پاک چین تجارت کے لیے ہم نے باضابطہ تحریری دستاویزات پیش کئے، پیپلز پارٹی اور ن لیگ نے چین سے متعلق پالیسی پر ایک ساتھ کام کیا۔