اسلام آباد سیشن کورٹ نے بغاوت کے مقدمے میں پاکستان تحریک انصاف (پی ٹی آئی) کے رہنما شہباز گل کے ریمانڈ اور حاضری سے استثنیٰ کی درخواست پر فیصلہ محفوظ کرلیا۔

عدالتی حکم نامہ میں کہا گیا ہے کہ شہبازگل کی حاضری سے استثنیٰ کی درخواست پرفیصلہ محفوظ کرلیا گیا۔ ایڈیشنل سیشنز جج عدنان رسول 6 جون کو فیصلہ سنائیں گے۔ شہبازگل کی جانب سے آج کی حاضری سے استثنیٰ کی درخواست دائر کی گئی۔

حکم نامہ میں کہا گیا کہ پراسیکیوٹر کے مطابق شہباز گل جان بوجھ کر عدالتی کارروائی کا حصہ نہیں بن رہے، پراسیکیوٹر نے شہبازگل کے ناقابل ضمانت وارنٹ گرفتاری جاری کرنےکی استدعا کی ہے۔

بغاوت کے مقدمے میں جاری حکم نامے میں مزید کہا گیا کہ درخواست گزار وکیل کے مطابق شہباز گل لاہور ہائیکورٹ کی اجازت سے بیرون ملک گئے، پراسیکیوٹر کے مطابق شہباز گل کی بیرون ملک جانے کی اجازت کی معیاد ختم ہوچکی ہے۔