لاہور احتساب عدالت میں آمدن سے زائد اثاثہ جات کیس میں سابق وزیراعلیٰ پنجاب عثمان کی عبوری ضمانت میں 23 مئی تک توسیع کردی۔

احتساب عدالت میں عثمان بزدار کے خلاف آمدن سے زائد اثاثہ جات انکوائری کیس کی سماعت ہوئی۔

عدالت نے عثمان بزدار کی ایک روزہ حاضری معافی کی درخواست منظور کرلی۔

احتساب عدالت نے عثمان بزدار کو بذریعہ وکیل نیب کو اثاثہ جات کی تفصیل جمع کرانے کا حکم دیتے ہوئے کہا کہ عثمان بزدار کو اثاثہ جات کی تفصیل جمع کرانے کا آخری موقع دے رہے ہیں، اگر آئندہ سماعت پر ملزم پیش نہیں ہوا تو ضمانت خارج کر دی جائے گی۔

عدالت نے سابق وزیراعلیٰ پنجاب کی حاضری معافی درخواست جمع کرائے جانے پر ریمارکس میں کہا کہ عثمان بزدار کی جانب سے ہر تاریخ پر نیا بہانہ سامنے آتا ہے ہمیں علم ہے وہ کیوں نہیں آئے ان کو جلاؤ گھیراؤ کیس میں گرفتاری کا ڈر ہے۔

عثمان بزدار کی جانب سے بیرسٹر مومن ملک ایڈووکیٹ پیش ہوئے جنہوں نے عثمان بزدار کی ایک روزہ حاضری معافی کی درخواست دائر کی۔

درخواست میں مؤقف اختیار کیا گیا کہ عثمان ںزدار کو سیاسی انتقام کا نشانہ بنایا جا رہا ہے، حالات کے پریشانی کی وجہ سے عثمان بزدار دل کی تکلیف میں مبتلا ہو گئے ہیں، عثمان ںزدار کی حالت خراب ہے حاضری معافی دی جائے۔

عدالت نے عثمان بزدار کی عبوری ضمانت میں توسیع کرتے ہوئے حاضری معافی کی درخواست منطور کرلی۔