افغانستان میں قائم طالبان حکومت نے پاکستان کی موجودہ صورتِ حال پر غم کا اظہار کیا ہے، اور امید ظاہر کی ہے کہ فریقین تحمل اور سمجھداری کا مظاہرہ کریں گے۔

بدھ کی رات افغان وزارت خارجہ کی جانب سے جاری بیان میں کہا گیا کہ امارت اسلامیہ افغانستان پاکستان میں ہونے والے حالیہ واقعات سے غمزدہ ہے، جس کے نتیجے میں بڑے پیمانے پر احتجاجی مظاہرے ہوئے اور بعض صورتوں میں تشدد بھی ہوا۔

بیان میں کہا گیا کہ امارت اسلامیہ افغانستان پاکستان میں سیاسی استحکام کو پاکستان کے مسلمان عوام اور خطے کے وسیع تر مفاد میں سمجھتی ہے اور امید کرتی ہے کہ فریقین تحمل اور سمجھداری کا مظاہرہ کریں گے۔

افغان وزارت خارجہ نے پاکستان میں مقیم افغان شہریوں کے تحفظ کے حوالے سے پاکستان میں قائم افغان حکومت کے دفاتر کو ضروری ہدایات جاری کی ہیں۔