توانائی اور خوراک کی قیمتوں میں اضافے کے باعث پاکستان نے مہنگائی میں مالیاتی بحران کے شکار سری لنکا کو بھی پیچھے چھوڑ دیا ہے۔

امریکی جریدے بلوم برگ کی رپورٹ کے مطابق اپریل میں پاکستان میں مہنگائی کی شرح 36 فیصد سے تجاوز کرگئی ہے، جو 1964 کے بعد سب سے زیادہ ہے۔

ادارہ شماریات کے اعداد و شمار کے مطابق اپریل میں مہنگائی میں2.41 فیصد کا اضافہ ہوا جس کے بعد مہنگائی کی ماہانہ شرح 36.42 فیصد کی بلند ترین سطح پر پہنچ گئی۔

بلوم برگ نے کہا کہ اپریل میں سری لنکا میں مہنگائی کی شرح 35 فیصد رہی جبکہ پاکستان میں مئی میں بھی مہنگائی کی شرح عروج پر رہے گی۔

بلومبرگ کے مطابق رواں سال پاکستانی کرنسی بدترین گراوٹ کا شکار رہی، جو ڈالر کے مقابلے میں 20 فیصد گری اور دنیا کی کمزور ترین کرنسی میں شمار ہوئی۔