سپریم کورٹ کی الیکشن کمیشن کو فنڈز فراہمی کی ڈیڈلائن ختم ہوگئی، واضح حکم کے باوجود وفاقی حکومت پنجاب میں انتخابات کے لئے 21 ارب جاری نہ کرسکی۔

الیکشن کمیشن آج سپریم کورٹ میں فنڈز کی عدم فراہمی کی رپورٹ جمع کرائے گی۔

مزید پڑھیں: وفاقی کابینہ نے الیکشن فنڈ کا معاملہ پارلیمنٹ کو بھجوانے کی منظوری دے دی

حکومت نے انتخابی اخراجات کا بل پارلیمنٹ میں پیش کر دیا، وزیر خزانہ اسحاق ڈار نے بل پیش کیا۔

اسپیکر قومی اسمبلی راجہ پرویز اشرف نے الیکشن اخراجات بل قائمہ کمیٹی کو بھجوا دیا، قومی اسمبلی کا اجلاس اب اگلی جمعرات کو ہوگا۔

مزید پڑھیں: قومی اسمبلی : اسحاق ڈار نے پنجاب خیبرپختونخوا انتخابات اخراجات بل پیش کردیا

قومی اسمبلی میں خطاب کرتے ہوئے اسحاق ڈار نے کہا کہ فوری الیکشن ملک کے مفاد میں نہیں، ایوان فیصلہ کرے، رقم الیکشن کمیشن کو فراہم کی جائے یا نہیں۔

انہوں نے مزید کہا کہ آناً فاناً منتخب جمہوری حکومت کے خلاف سازش بچھا دی گئی جس کے تحت کامیاب حکومت کی معاشی پالیسیوں کو نقصان پہنچایا گیا، غیرملکی دورے پر بھی شکوک و شبہات پھیلائے گئے۔

مزید پڑھیں: وفاقی کابینہ الیکشن کمیشن کو انتخابات کیلئے فنڈز کی فراہمی پر کشمکش کا شکار

چیئرمین سینیٹ صادق سنجرانی نے سینیٹرز کی تجاویز جمعرات تک طلب کرلی اور کہا کہ منی بل پر کمیٹی رپورٹ جمعہ تک ایوان میں جمع کرائی جائے۔

اس سے پہلے وفاقی کابینہ نے فنڈز کی منظوری کے بجائے معاملہ پارلیمنٹ میں پیش کرنے کی منظوری دی۔

واضح رہے کہ 4 اپریل کو سپریم کورٹ نے وفاقی حکومت کو 10 اپریل تک الیکشن کمیشن کو 21 ارب جاری کرنے کا حکم دیا تھا۔