قومی ایئرلائن پی آئی اے کی لاہور سے مدینہ جانے والی پرواز میں اٹھارہ گھنٹے کی تاخیر پر مسافروں نے ایئرپورٹ پر احتجاج کیا۔

شیڈول کے مطابق پی کے 747 سیون نے ہفتہ کی رات 9 بجکر 10 منٹ پر مدینہ روانہ ہونا تھا مگر فنی خرابی کے باعث تاخیر کا شکار ہوگئی۔ پرواز کے منتظر300 عمرہ زائرین میں بزرگ شہری اور بچے بھی شامل ہیں۔

مسافروں کو رات ایئرپورٹ پر ہی گزارنا پڑی اور سحری کا انتظام بھی اپنی مدد آپ کے تحت کرنا پڑا جبکہ پی آئی اے ترجمان کا کہنا ہے کہ مسافروں کو رات ہوٹل میں ٹھرایا گیا۔

مسافروں نے شکوہ کیا کہ انھیں فلائٹ کی روانگی سے متعلق درست معلومات مہیا نہیں کی جارہی ہیں، اس معاملے پر ایئرلائنز کے عملے سے بحث و تکرار بھی ہوئی۔ مسافروں کی جانب سے ایئرلائنز کے ملازمین کے ناروا سلوک کے خلاف ایئرپورٹ پر احتجاج بھی کیا گیا۔

پی آئی اے ترجمان کا کہنا ہے کہ جہاز کی فنی خرابی دور کرنے کے لئے ضروری پرزے کراچی سے منگوائے گئے ہیں، رات سے خرابی دور کرنے کا کام جاری ہے، تکنیکی خرابی دور ہوتے ہی پرواز کو روانہ کر دیا جائے گا۔