سندھ ہائی کورٹ کے ناظر نے اکاؤنٹنٹ جنرل سندھ کو چیف سیکرٹری سندھ سہیل راجپوت کی تنخواہ روکنے کے لئے خط لکھ دیا۔

سندھ ہائی کورٹ میں محکمہ آب پاشی کی جانب سے واجبات کی عدم ادائیگی کے خلاف درخواست پر سماعت ہوئی۔

اشرف ڈی بلوچ نے سندھ ہائی کورٹ میں واجبات کی عدم ادائیگی پر درخواست دائر کی، جس پر عدالت نے محکمہ آبپاشی سے رپورٹ طلب کی اور پھر واجبات ادا کرنے کا حکم دیا۔

سندھ ہائی کورٹ نے 15 مارچ 2023 کو 3 دن میں واجبات ادا کرنے کا حکم دیا تھا، اور حکم دیا تھا کہ 3 دن میں عدم ادائیگی کی صورت میں چیف سیکریٹری کی تنخواہ روک دی جائے۔

چیف سیکرٹری سندھ سہیل راجپوت کی جانب سے تاحال رقم جمع نہ کرانے پر ناظر سندھ ہائی کورٹ نے اے جی سندھ کو چیف سیکریٹری سندھ کی تنخواہ روکنے کی ہدایت کردی ہے۔

ناظر سندھ ہائی کورٹ نے اکاؤنٹنٹ جنرل سندھ کو اس حوالے سے خط بھی لکھ دیا ہے، جس میں کہا گیا ہے کہ چیف سیکریٹری سندھ کی تنخواہ بند کر کے رپورٹ پیش کی جائے.

خط میں متن میں کہا گیا ہے کہ محکمہ آبپاشی نے اشرف ڈی بلوچ کو عدالتی حکم کے باوجود تاحال 1 ارب روپے کے واجبات ادا نہیں کیے۔