مسلم لیگ ن کے رہنما شاہد خاقان عباسی کا کہنا ہے کہ توشہ خانہ تحفے کی ملکیت اس کی ہوتی ہے جس کو ملتا ہے، کسی کی ہتک کرنے سے پہلے سوچ لیا کریں۔

اسلام آباد کی احتساب عدالت کے باہر میڈیا سے بات کرتے ہوئے سابق وزیراعظم اور ن لیگ کے سینئر رہنما شاہد خاقان عباسی کا کہنا تھا کہ ہم پر بے بنیاد الزامات عائد کئے گئے، مقدمات چلے اور ثبوت پیش نہیں کئے گئے، سالوں سے لوگ احتساب عدالتوں کے چکر لگاتے ہیں فیصلے نہیں ہوتے۔

شاہد خاقان عباسی نے کہا کہ توشہ خانہ میں میرا بھی نام سامنے آیا ہے، توشہ خانہ کا تحفہ ملک کے عہدے دار کو ملتا ہے، توشہ خانہ تحفے کی مالیت کا اندازہ لگاتا ہے، اور تحفے کی ملکیت اس کی ہوتی ہے جس کو ملتا ہے، تحفے کی ادائیگی کر کے تحفہ وصول کیا جاتا ہے، کسی کی ہتک کرنے سے پہلے سوچ لیا کریں، اگر میں نے توشہ خانہ سے تحائف کو غلط طریقے سے حاصل کیا تو ضرور کارروائی کی جائے۔

سابق وزیراعظم کا کہنا تھا کہ ہم کوئی سیاسی جماعت نہیں بنا رہے، ن لیگ ہماری پارٹی ہے، جس نے مجھ پر جو مقدمہ بنانا ہے مقدمہ درج کریں، انصاف کا تقاضا ہے کہ نئے چیئرمین نیب غریب لوگوں کے کیسز ختم کریں، سیاست دانوں کے بے شک چلائیں۔