پاکستان تحریک انصاف کے مرکزی صدر چوہدری پرویز الہٰی نے سانحہ زمان پارک کی جوڈیشل انکوائری کرکے قصور وار کو پھانسی دینے کا مطالبہ کردیا۔

سماجی رابطے کی ویب سائٹ ٹوئٹر پر جاری بیان میں سابق وزیراعلیٰ پنجاب چوہدری پرویز الہٰی نے کہا کہ سانحہ ماڈل ٹاؤن میں رانا ثناء اللہ جیسے لوگوں کو سزا ہو چکی ہوتی تو آج سانحہ زمان پارک رونما نہ ہوتا۔

انہوں نے کہا کہ جوڈیشل انکوائری کے ملزموں میں سرفہرست محسن نقوی اور آئی جی پنجاب ہیں، جوڈیشل انکوائری کرکے قصور وار کو پھانسی دی جائے۔

چوہدری پرویز الہٰی نے مزید کہا کہ آئی جی پنجاب، انتظامیہ اور پولیس علی بلال (ظل شاہ) کی شہادت میں برابر کے قصور وار ہیں، ایسی مثال بنائی جائے تاکہ آئندہ انتظامیہ اپنے اختیارات اپنے گریبان تک رکھے۔

سابق وزیراعلیٰ پنجاب نے مطالبہ کیا کہ انتظامیہ کے تمام قصور وار افراد کو کٹہرے میں لایا جائے تا کہ آئندہ کسی کو ایسی گھناؤنی حرکت کرنے کی جرأت نہ ہو۔