لاہور ہائیکورٹ نے پاکستان تحریک انصاف (پی ٹی آئی ) کے چیئرمین عمران خان کی ریلی نکالنے کے خلاف درخواست پر فیصلہ محفوظ کرلیا۔

لاہور ہائیکورٹ میں عمران خان کی ریلی نکالنے کے خلاف درخواست پر سماعت ہوئی۔

درخواست مسلم لیگ (ن) لائیرز فورم جنرل سیکرٹری فرخ خان لودھی نے دائر کی۔

درخواست میں عمران خان، پنجاب حکومت، کمشنر اور سی سی پی او لاہور کو فریق بنایا گیا ہے۔

درخواست میں مؤقف اپنایا گیا کہ عمران خان نے عدالت میں بیماری کی درخواست جمع کروائی کہ پیش نہیں ہوسکتا، چیئرمین پی ٹی آئی کے بیانات موجود ہیں کہ ان کی جان کو خطرات لاحق ہیں، وزیر آباد حملے کے بعد شدید خطرات لاحق ہیں، ڈی سی کی اجازت نہ دینے کے باوجود ریلی نکالی جا رہی ہے، ریلی کے باعث نقص امن کے خطرات ہیں۔

درخواست میں استدعا کی گئی کہ عدالت عمران خان کو ریلی نکالنے سے روکنے کا حکم دے۔

بعدازاں عدالت نے عمران خان کی ریلی نکالنے کے خلاف درخواست پر فیصلہ محفوظ کرلیا۔