پاکستان تحریک انصاف کے چیئرمین عمران خان کے خلاف آج اسلام آباد کی عدالتوں میں 3 کیسز کی سماعت ہوگی۔

سیشن عدالت، انسداد دہشت گردی عدالت اور اسلام آباد ہائیکورٹ میں عمران خان کے خلاف آج 3 کیسز سماعت کے لئے مقرر ہیں۔

چیئرمین پی ٹی آئی کی جانب سے آج زیرسماعت کیسز میں پیش نہ ہونے کا امکان ہے۔

ذرائع کے مطابق عمران خان کی لیگل ٹیم سیکیورٹی خدشات پر استثنیٰ کی درخواستیں دائر کرے گی۔

ڈسٹرکٹ اینڈ سیشن کورٹ میں خاتون جج دھمکی کیس کی سماعت ہوگی جبکہ انسداد دہشت گردی عدالت میں سنگجانی مقدمے کی سماعت ہوگی۔

محسن شاہنواز رانجھا حملہ مقدمے میں عمران خان کی عبوری ضمانت کے کیس کی بھی سماعت آج ہوگی۔

اسلام آباد ہائیکورٹ نے عمران خان کی 9 مارچ تک عبوری ضمانت منظور کی تھی۔

ٹریان کیس میں درخواست گزارکے وکیل دلائل جمع کرائیں گے۔

عمران خان کی درخواست ضمانت پر اسلام آباد ہائیکورٹ میں سماعت آج ہوگی، چیف جسٹس عامر فاروق درخواست پر اعتراضات کے ساتھ سماعت کریں گے۔

عمران خان کے وکلاء نے گزشتہ روز اسلام آباد کی عدالتوں میں ویڈیو لنک کے ذریعے پیش ہونے کی درخواست دی تھی۔

درخواست میں مؤقف اختیار کیا گیا تھا کہ اسلام آباد کے تمام کیسز میں ویڈیو لنک پر پیشی کی اجازت دی جائے، سیکیورٹی وجوہات پر ذاتی پیشی سے عدالتی کارروائیاں بھی تعطل کا شکار ہوتی ہیں۔

دوسری جانب نیب راولپنڈی نے آج عمران خان کو طلب کر رکھا ہے جبکہ نیب کی جانب سے آج بشری بی بی کوبھی طلب کیا گیا ہے۔

نیب نوٹس میں عمران خان سے 7 تحائف اور توشہ خانہ تحقیقات میں 6 رولیکس گھڑیوں سے متعلق پوچھا گیا ہے۔