خیبرپختونخوا میں الیکشن کی تاریخ کا معاملہ لٹک گیا اور گورنر کے پی غلام علی اور الیکشن کمیشن کی مشاورت بغیر کسی نتیجے کے ختم ہوگئی۔

خیبر پختونخوا میں انتخابات کی تاریخ کیلئے الیکشن کمیشن ٹیم گورنر ہاؤس پشاور پہنچی، ٹیم میں سیکرٹری الیکشن کمیشن، اسپیشل سیکرٹری اور ڈی جی لاء شامل تھے۔ جب کہ الیکشن کمیشن خیبرپختونخوا بھی ٹیم کے ہمراہ تھی۔

الیکشن کمیشن کی ٹیم اور گورنر خیبر پختونخوا حاجی غُلام علی سے انتخابات کی تاریخ پر مشاورت ہوئی، تاہم دونوں فریقین میں خیبرپختون خوا میں انتخابات کی تاریخ پر اتفاق نہیں ہوسکا۔

ذرائع کا کہنا ہے کہ الیکشن کمیشن اور گورنر خیبرپختون خوا کے مابین ہونے والی مشاورت بغیر نتیجہ ختم ہوگئی ہے اور صوبے میں انتخابات کی تاریخ کا معاملہ لٹک گیا ہے۔

ذرائع کے مطابق مشاورت میں گورنر غلام علی نے صوبہ خیبر پختونخوا میں پر امن انتخابات کے انعقاد پر زور دیا، تاہم الیکشن کمیشن حکام نے گورنر کو سیکیورٹی پر بریفنگ دینے سے معذرت کرلی، اور گورنر کو انتخابی تاریخ تک محدود رہنے کا مشورہ دیا، جس کے باعث دونوں کے مابین تاریخ کے حوالے سے ڈیڈلاک برقرار ہے۔

واضح رہے کہ سپریم کورٹ کے حکم پر گورنرغلام علی نے الیکشن کمیشن کو مشاورت کے لیے بلا رکھا تھا۔