وزیراعظم شہباز شریف کا کہنا ہے کہ امریکا سے دو طرفہ کثیرالجہتی تجارتی تعلقات، انفارمیشن ٹیکنالوجی، زراعت اور صنعت کے شعبوں میں تعاون کو مزید بہتر بنانا ترجیحات میں شامل ہے۔

شہبازشریف سے امریکا میں پاکستان کے سفیر مسعود خان نے لاہور میں ملاقات کی، اس دوران سفیر نے وزیراعظم کو امریکا میں موجود پاکستانی سفارتی مشن کی کارکردگی سے آگاہ کیا۔

وزیراعظم نے سفیر کو ہدایت کی کہ امریکی سرمایہ کاروں کی پاکستان میں سرمایہ کاری کو مزید موثر بنانے کے لیے مختلف شعبوں میں ممکنہ مواقع کو اجاگر کرنے کے لئے بھرپور اقدامات کئے جائیں۔

شہباز شریف نے مسعود خان کو امریکی سرمایہ کاروں کو درپیش مسائل کی نشاندہی کرنے کی بھی خصوصی ہدایت کی۔

ملاقات کے دوران وزیراعظم کا کہنا تھا کہ سرمایہ کاروں کے لئے درآمدات و برآمدات پر لاگو قوانین و ضوابط کو آسان بنانے کے لیے حکومت ترجیحی بنیادوں پر کام کر رہی ہے۔