لاہور ہائیکورٹ میں سپریم کورٹ کے پنجاب میں انتخابات کرانے کے حکم پر عملدرآمد کے لئے متفرق درخواست دائر کر دی گئی۔

لاہور ہائیکورٹ میں درخواست منیر احمد نامی شہری نے اظہر صدیق ایڈووکیٹ کے توسط سے دائر کی ہے۔

درخواست میں الیکشن کمیشن، وفاقی حکومت، حکومت پنجاب، چیف سیکرٹری اور آئی جی پنجاب کو فریق بنایا گیا۔

دائر درخواست میں مؤقف اختیار کیا گیا ہے کہ سپریم کورٹ کے فیصلے کے مطابق صدر مملکت نے پنجاب میں الیکشن کی تاریخ مقرر کردی، سپریم کورٹ نے تمام اداروں بشمول نگران حکومت کو الیکشن کےلئے کمیشن کی معاونت کا حکم دے رکھا ہے۔

درخواست میں مزید کہا گیا ہے کہ آئین کے آرٹیکل 220 کے تحت تمام ادارے الیکشن کمیشن کی معاونت کے پابند ہیں، چیف سیکرٹری پنجاب اور آئی جی پنجاب لاہور ہائیکورٹ پیش ہوکر معاونت کی یقین دہانی کرائی ہے۔

درخواست میں استدعا کی گئی ہے کہ عدالت تمام اداروں اور نگران حکومت کو الیکشن کرانے کے لئے الیکشن کمیشن کی معاونت کا حکم دے۔